洪禮賢講馬 YIN''S TALK：要知入馬場為乜

猪拉多纳

　　號稱地上最強嘅西班牙捧走世界盃，賽後或許覺得好正路啫，但球王美斯同朗尼喺決賽周，一粒波都入唔到，仲唔係爆出巨冷，唔知有幾轟動和摧毀性，大可以問問身邊的波友（或者場場買佢哋「首名入球」而吊緊鹽水嗰班）。至於甚麼葡萄牙、巴西一早過堂，其中巴西更係領先一球之下，下半場畀荷蘭轟入兩粒， 同大家講Byebye，亦都唔會唔係令人嚇親的賽果。

　　睹波唔賭波，我贊成！因為你會清晰知道自己做緊乜，鍾意美斯嘅話，你咪飛去南非，場場坐定定欣賞佢點扭波，盡情睇佢如何漂亮嘅個人技術，使乜因為係佢Fans就要買「首名入球」，或者每場阿根廷比賽都買上盤。
　　
　　話題扯到賽馬亦冇大不同，入場睇馬究竟抱住甚麼心態，你係韋達迷，或者係葉楚航忠心粉絲，可用純欣賞角度，千萬不要混淆身分。像場內有唔少揸相機的拍攝愛好者，可能全日1蚊都無投注，唯一在場內「拔鎗」，可能係飲飲食食，而佢哋好清楚知道自己做緊乜，就係想影靚相咁簡單，滿足完拍攝呢個單一目的後，佢哋就會離場。

　　睹馬和賭馬係兩碼子的事，混淆了身分的話，冇錯，柏寶1日6W，可能為你帶來1次大豐收，但3期唔贏又點呀？就算平注去計，之前贏嘅差唔多嘔凸。一個唔好彩，玩夾叠，3期注碼要乘幾次方，條負就襟計了。所以，喺馬場想有咩得着，記得知道點解要入場。