馬主論戰

魑魅魍魉

喜威寶咪睇小

　　巫斯義今日嚟客串，我諗佢應該唔會空手而回，尾場方廐「喜威寶」交畀佢操刀，有一定留意價值。雖然呢隻馬季內只響泥地1650米贏過一場頭馬，但上季試過響皇太后盃同「好先生」串Q，草地一定啱跑，況且近兩場都輸唔遠，話唔定響今場現真身。

　　另一匹要留意嘅巫斯義坐騎係第十場「揀得正」，上場響泥地一哩爆冷贏馬，五歲馬評分突破新高，證明依家先至真正大熟，今次轉爭田草1600米，照計一定啱發揮，冷冷哋吼實佢。

任達華

電訊巨星要吼

　　今日我哋隻「電訊巨星」又上陣，呢隻馬上場贏得好險，跑多一步可能已經輸埋，不過睇番同場嘅「漸信良駒」、「龍得風雲」，再出表現都唔曳，今次佢再跑番贏馬路程，我睇都有三甲機會，而我亦會同一班同事齊齊入場打氣。

　　其他心水馬，要留意第七場「中國心」，落番四班跑一定有着數，始終季內未交代，一定會搏。另外半冷馬要吼住第二場「實在好」，前仗響四班跑泥地 1200米都輸唔遠，今次落班兼抽到一檔，都有出冷條件。

張敬山

松風路有專長

　　姚本輝今日出馬唔多，但每匹馬都有一定實力，我睇好佢有馬贏。最啱心水係第七場「松風」，唔經唔覺今季已經贏咗三場，贏親都係1400米，證明路有專長。今次繼續跑番贏馬路程，難得仍然可以響四班上陣，一定把握機會再數胡。

　　另一匹要留意嘅姚廐馬係「勁信心」，雖然上場以頭位輸畀「好運精選」，但係已經彈甩第三名嘅「可圈可点」好遠，擺明係質高分子。今次增程跑 1200米，應該難佢唔到，排埋一檔可順利開齋。

梁廷鏘