賠率有路捉：雄爆 W有景轟

魑魅魍魉

　　第五場四班1200米實力馬抽晒外檔，形勢唔易睇得透，噚日早飛「家橋」係54蚊大熱門，可能係由於柏寶策騎，但「雄爆」居然係62蚊次熱門，仲硬淨過七倍嘅「喜在心頭」，真係有啲突然，呢隻馬出名難贏，至今跑過三十場只係得一W，而且出自成績麻麻嘅薛達志馬房，根本十倍都嫌少，好難相信普羅馬迷會咁睇好，冇估錯呢注早飛應該嚟自一批有識之士，千祈咪唔信。睇番隻馬上季喺58分大勝田草1400米，實力有目共睹，目前減至51分，一定有着數，加上連埋同主馬「勁爆力」轉投薛廐仲未交代，幕後一定心急，今晚票勁小心到位。

威力高票硬要捧

　    賠率古怪仲有第六場「威力高」，呢隻馬至今十二戰連一場位置都冇，一早輸怕人，試問邊有人仲敢買落去，上仗隔晚都有十倍，臨場亦係廿一倍冷門。但噚日早飛居然只得76蚊W，明顯硬淨過上仗，亦顯示出有人睇好，提防今晚真係交出好表現呀。

杜利萊再做騎師王

　    騎師王方面，杜利萊剛戰爆冷榮登騎師王，睇佢今晚手馬中，「駿蹄飛」、「好友緣」、「喜在心頭」同「旺家多寶」都係實力馬，加埋邊線坐騎「森淼盛」，真係有唔錯餐士，最重要賠率唔係乏味，一於搏呢位法國好手冧庄再做騎師王喇。  

周仲