蔡約翰新馬第1W如願以償

魑魅魍魉

練馬師蔡約翰喺香港咁多年以嚟，一直都唔係咁熱衷跑新馬賽，估唔到蔡神仙尋日一出手即刻有料到，憑「如願以償」贏得歷年新馬賽第一Ｗ。
       
如願以償（右）與陽明飛飛一Ｑ返嚟，蔡約翰笑到四萬咁口。
阿媽打氣萊仔發威

除咗「如願以償」贏馬外，廐侶「陽明飛飛」成功包Ｑ，兩隻馬掟甩季軍「幸運多多」約六個馬位，認真誇張。
       

連續三次賽事食白果嘅法國型男杜利萊，尋日專登帶埋媽媽入場，果然冇喺母親大人面前失威，喺頭場一千米直路新馬賽，即刻靠初出馬「如願以償」先拔頭籌，而杜媽媽將會喺香港逗留三個禮拜，大家不妨吼實杜利萊呢段日子嘅表現啦。