賠率有路捉：清風送爽墊底飛勁

魑魅魍魉

　    第九場「清風送爽」在港跑過三仗都冇飛，上仗仲係十二倍冷門，不過噚日早飛WP都有墊底飛，65蚊W已經好突然，位置仲要係1.1大熱，好明顯有人極之睇好。睇番佢喺愛爾蘭跑1400米三次非勝即位，路有專長，難怪今戰加程跑首本途程立即有飛，加上何良近季買入嘅北半球自購馬如「賀喜」、「好先生」及「祥勝愛駒」等統統短時間內交出頭馬，「清風送爽」贏馬有乜出奇呀﹖

　    第三場五班1600米亂局一場，但睇飛「朝東之星」信心唔講得笑，呢匹薛順強坐騎早飛居然WP大熱，47蚊W，位置15蚊，以一匹跑過十八場連一次位置都無嘅低班馬嚟講，邊有馬迷買得落手，呢啲一定唔係公眾飛，絕對信得過。

　    騎師王方面，鄭雨滇近期旺，今戰坐騎如「濰坊」、「幸運相架」、「福將臨門」及「豪情拍檔」均分量十足，有廿幾倍絕對搏得過。　

周仲