高清睇跑馬：歡樂繽紛食尾胡

魑魅魍魉

　　今季總場次494田草二班1000米，「明燈」出閘即留在尾叠，直至四百米才望空衝刺，當時見潘頓仍未推騎，而多匹對手則已發力，到了三百米推騎動作依然不大，但馬匹走勢勁如炮彈，終點前輕鬆贏個多馬位，而且全程未打一鞭，姿態兵不血刃之餘，五十六秒五亦是今季二班同程最快時間，難怪賽後被重手加十分﹔這次重配韋達有力連贏四場兼捧盃。

　　另外，季內總場次495田草三班1400米，「歡樂繽紛」排外檔仍捧成十六蚊大熱，出閘後即脫穎而出，然而內檔馬太多，對手當然不會輕易讓路，結果被迫居於三叠，慶幸前邊有隻「不言而喻」，總算有遮擋不用望空。大半程轉彎拍住「至勇飛龍」，去到彎位尾段，後駒移出令「歡樂繽紛」被頂出四叠更蝕位，但入直路後走勢強勁，韋達遲遲未開鞭仍輕易追過對手﹔今日升上二班負磅大減，尾場大部分對手亦非二班最頂級分子，穩位望贏必可做到。

Sam