紫百合征西 下盤有作維

猪拉多纳

穩守突擊有料到 盃賽客途8戰不敗

歐霸盃4強首回合大戰今晚打孖上，西維爾會喺主場大戰費倫天拿，就算有地利都唔似讓得起半一。雖然西維爾近排撻番着，啱啱輸畀皇馬場波係威係勢，但要留意「紫百合」費倫今季踢出盃賽作客王嘅表現，開季至今盃賽客戰8場未輸過，強如砌低皇馬嘅祖記都喺意盃主場輸畀佢哋，由此可見教練蒙迪拿嘅穩守突擊戰術堅有料到，受讓半一博下盤！

（有線61、64、201及203周五凌晨3:05直播）
西維爾教頭遭挖角

西維爾剛戰西甲喺主場以2:3僅負皇馬，未能延續15場不敗強勢，幸好佢哋個射手卡路士巴卡狀態回升，頻頻取得「士哥」。表面上睇嚟今場鬥「紫百合」可以秤先，弊在最近有傳言話，西維爾教練艾美利畀盛傳易主嘅AC米蘭睇中，等單賣盤交易落實之後就好可能會被撬走。大戰前爆單咁嘅消息，對西維爾陣營士氣唔多唔少都有啲影響。

費倫天拿早兩日喺意甲主場3:1砌低切塞納，總算喺意大利盃出局、聯賽走勢下滑後識得反彈。要留意「紫百合」喺盃賽作客勁到冇朋友取得6勝2和佳績，唔止對熱刺同基輔戴拿模力保不敗，甚至試過兩次打沉羅馬，就連祖雲達斯都唔係佢哋對手，西維爾想贏都唔係咁易！
沙拿要為前途而戰

「紫百合」得此戰績，足證教練蒙迪拿嘅戰術，更加適合喺客戰下穩守突擊。而且最近傷愈復出嘅射手馬里奧高美斯，今季踢盃賽表現唔錯，季中借用嘅翼鋒穆罕默德沙拿又要為前途而戰，博表現爭取加盟其他大球會搵銀，各位信「靚佬」蒙迪拿嘅話就敲下盤啦！
Data King：西維爾連開3口半場大

‧西維爾過去對意大利球會得1和3負。

‧西維爾連開3場半場入球大。

‧費倫以往3次作客西班牙球會全敗。

‧費倫連開3場角球大。
乜都玩錦囊：「紫百合」上半場即駁火

費倫天拿除咗盃賽作客堅勁，仲好鍾意同對手駁火，對上6場盃賽作客，就先後有4次開半場入球大，證明佢哋習慣喺上半場即刻向對手施壓，撞啱西維爾進攻火力有番咁上下，除咗下盤之外，半場入球大都值得考慮。
盤路解碼：費倫天拿今季盃賽作客有6勝2和。