普雷斯頓副選打沉奧咸

猪拉多纳

預備組孖寶激發隊友鬥志

為咗擔正，你可以去到幾盡？普雷斯頓嘅祖爾拜林同史葛拉亞特，由預備組搏到上番嚟一隊打正選，證明肯努力嘅話一定有回報。普雷斯頓喺國際賽檔期陣容不整，領隊格雷臣講明會畀機會副選兵，佢哋為爭上位肯定會珍惜機會，今晚喺英甲主場鬥奧咸正正係「騷哥利」良機，一於捧1.88倍主勝。

（開賽時間：周二凌晨2:35）
奧咸幾件踢太公波缺陣

司職中場嘅祖爾拜林同左閘史葛拉亞特，季初畀普雷斯頓領隊格雷臣投閒置散，連一隊都入唔到，不過呢兩隻仔爭氣，喺預備組踢到曉飛之後獲重召上一隊，8月底終於重返正選，當中祖爾拜林上仗仲有波入，協助球隊大炒華素爾3:0。適逢中場堪富利同前鋒侯姆今晚缺陣，格雷臣話會搵兩個副選兵頂佢哋，邊兩位後備仔今晚有份落場，都肯定會搵祖爾拜林同史葛拉亞特做借鏡對象！

計埋10月7日舉行嘅英格蘭聯賽錦標次圈賽事，奧咸將會喺4星期內兩度造訪普雷斯頓，呢支由李爾莊臣領軍嘅球隊今晚想攞頭威唔容易，事關後衞祖傑斯、雲徹斯特同中場基克米拿都因為要踢太公波缺陣，守將干洛布朗同射手查理麥當奴又養緊傷，個陣殘成咁點同普雷斯頓鍊呀？