卡迪夫城齊心o趙拖肥

猪拉多纳

騎呢好老細入場打氣

英超開咧踢咗2至3輪，當中最令小妹意外嘅比賽，當然係新升班嘅卡迪夫城爆冷喺主場以3:2反勝豪門曼城啦，今晚呢支威爾斯球隊食住個勢，繼續坐鎮主場迎戰愛華頓，既然上仗對住「藍月亮」都可以反敗為勝，小妹相信實力今非昔比嘅「拖肥糖」，更加係九死一生，冷吼卡迪夫城3.15倍主勝！

事隔51年重返頂級聯賽嘅卡迪夫城，開咧戰作客不敵韋斯咸0:2，雖然卡城全場有12次埋門，但就只得1次中框！點知去到第2輪賽事，卡城竟然有驚喜喎，憑曼聯舊將費沙甘保梅開二度，加埋艾朗根拿臣嘅入波，主場反勝上季亞軍曼城3:2，唔單止打開今季勝門，仲係球會史上第一場英超贏波添。
愛華頓頹爆英超未開齋

睇番卡迪夫城2場聯賽嘅表現，小妹覺得佢哋嘅實力絕對係喺降班行列之上，所以今季佢哋應該唔止完成護級任務咁簡單。尤其係前線球員嘅表現更加有板有眼，韋定咸、艾朗根拿臣同費沙甘保嘅威力真係唔講得笑！仲有，卡城位班主陳志遠雖然衣着騎呢，但陳生真係有心搞好隊波，不斷燒錢之餘仲入埋場親自為球員打氣，有位咁好嘅老細，相信卡城眾將一定會格外賣力嘅！

相反，愛華頓開季至今仲未開齋，頭兩場賽事分別以2:2同0:0賽和諾域治同西布朗，周中聯賽盃仲要打到加時先贏到甲組仔，班兵明顯冇態啦！咁又難怪嘅，事關帶足愛華頓11年嘅莫耶斯轉投曼聯，前韋根教頭馬天尼斯上任，球員未必可以一時三刻就適應新領隊嘅戰術！唯一值得留意嘅係19歲中場巴克里，佢喺第1場英超一鳴驚人入靚波，就連領隊馬天尼斯都覺得佢潛質優厚，不過講到尾，唔通1個細路就可以救到成隊波咩？今晚作客如狼似虎嘅卡城，睇怕都係凶多吉少咯。