買戰利品旨意ＦＣ東京

猪拉多纳

下星期小妹會去東京拍旅遊節目，但時間緊湊，未能入場睇日本對危地馬拉，為遷就國際賽期，日職加開周中快車，其中ＦＣ東京喺主場2比3輸畀鳥棲砂岩嗰場我就最失望。當日「東京」其實唔算踢得太差，閃電連失兩球，其後喺下半場追和，點知貪心急於贏番轉頭最終輸埋。今日佢哋作客廣島三箭被睇低一線，我博東京不敗。

（有線61及201台周六晚6時直播）
三箭頹頹哋讓唔起

「三箭」周中不敵甲府風林，一班中前場又失準，連射門次數都唔夠對手多。球隊已經連續三場不勝，狀態頹頹哋，今日再衰多次又有幾出奇？ＦＣ東京防守係唔太穩陣，但上場有波入嘅渡邊千真依家喺射手榜第二，所以佢為公為私都會力爭「士哥」，加上仲有長谷川阿里亞同高橋秀人呢兩位有埋門能力嘅隊友後上支援呢！

今日ＦＣ東京作客，所以壓力喺主隊三箭身上，咁對目標係摸和攞番一分嘅東京有利，如果「東京」生生性性逼和主隊，我就可以買多啲戰利品返香港喇。