幼獅省靚招牌做大「蘇」

猪拉多纳

主帥鶴臣客串領軍
英格蘭U21今晚喺熱身賽主場對蘇格蘭U21，因為教頭皮雅斯被炒後未請到人，將會由大國腳領隊鶴臣客串領軍，可能因為佢江湖地位較高，今次英格蘭U21嘅陣容總算似番啲樣，成班生牯仔博上位，吼1.65倍入球大最實際。

（now621台周三凌晨2:30直播）

蘇格蘭U21牌面削
前兩個月嘅U21歐國盃，英格蘭U21夠膽死喺分組賽3戰全敗包尾出局，教頭皮雅斯想繼續賴死都唔得，而且英格蘭足總今場搵大國腳領隊鶴臣帶隊，目的好明顯係想省番靚招牌，呢次熱身賽嗌得郁前鋒森美艾美奧比、翼鋒史達寧、中場舒維爾同中堅米高堅尼歸隊，鶴臣做到皮雅斯就未必得喇！

仲有呀，季前熱身賽踢到曉飛嘅曼聯新星連格，都有份入選今次大軍，就算前鋒湯馬士恩斯同中場榮基梳爾因傷退隊，都唔憂冇波入。對家蘇格蘭U21牌面係削啲，但前線總算有個射手麥高治撐住，上季佢喺些路迪有唔少上陣機會，大家知啦，英格蘭U21後防向來豆腐，想攞威惟有鬥攻，入球大好路。