布力般糟質甲組仔

猪拉多纳

卡素爾頭痛醫腳防守曳
布力般流浪主帥份工好鬼難撈，上季貝治同艾伯頓分別教咗57同67日就畀會方兜咗，證明揸旗嗰幾位印度班主唔容易服侍，現任領隊加利保耶想保住份工嘅話，今晚喺聯賽盃首圈造訪卡素爾不容有失，布力般讓平半一於要上盤。

（廣東體育周四凌晨2:45直播）

主帥爭勝保飯碗
加利保耶今個夏天動作多多，計埋前日簽入喀麥隆後衞辛高，新季已經羅致咗11位球員，雖然話布力般喺英冠開鑼戰有魯賓洛堅拿因傷退下火線，好彩後備入替嘅貝斯就省入救命波，幫球隊逼和打比郡搶番1分，有呢位前紐卡素射手夥拍上季喪入29球嘅佐敦洛迪斯攻堅，布力般夠晒本錢砌低卡素爾。

唔係話睇小越級挑戰嘅卡素爾，不過佢哋嘅領隊艾保特真係唔醒水，隊波係上季英甲失波最多嗰隊（44戰失77球），後防明明就唔掂，偏偏季前仲走去簽聖美倫前鋒李維士古爾同燦美爾翼鋒艾莫，根本冇執執個後防，結果英甲首戰咪輸鑊勁畀奧連特1:5囉，今晚對住火力同戰鬥力更強嘅布力般，想輸少球都難！