遇皇不勝 莫帥宿命？

猪拉多纳

莫連奴嘅主帥生涯戰績輝煌，包攬英超、意甲、西甲同葡超4大聯賽冠軍，又攞過2次歐聯同1次歐霸盃錦標，成就卓越。不過，佢揸旗帶隊下卻從未贏過皇家馬德里，或多或少都係佢主帥生涯嘅一件憾事。

翻查往績，「寸王」曾帶領波圖兩度挑戰「銀河艦隊」，僅錄得1和1負；反而喺巴塞做助教時，就曾有過5次擊倒皇馬嘅紀錄。莫帥離隊後話咁快就有機會倒戈皇馬引來全球矚目，但佢要戰勝舊主卻有一定難度。03/04球季係波圖全盛時期，最後更奪得歐聯冠軍，不過球隊於分組賽2鬥皇馬都落於下風。

曾帶波圖兩鬥艦隊
主場迎戰「銀河艦隊」，波圖雖先開紀錄，但最後倒輸3球；作客一場皇馬因篤定出線而留力，但波圖僅能賽和1比1。不過，莫帥喺巴塞任助教嘅4季中，10次對賽皇馬取得5勝2和3負，今場能否打破宿命，就要打過先知。