超班QPR打殘埃克塞特

猪拉多纳

今季降落英冠嘅昆士柏流浪（QPR），今晚喺英聯盃首圈登場作客英乙埃克塞特。QPR今夏雖放走個別球星，但基本骨幹依然保留，實力絕對係英冠頂級。不過領隊夏利列納仲未夠皮，揚言要喺轉會窗結束前繼續增兵，班球員唔想冇碇企，今晚落場一定搏晒命，贏盡級數同鬥志，梗係捧2.38倍「讓客」啦！（開賽時間：周三凌晨2:45）

英超班底夏利叔照樣增兵
新一季英冠上周末開鑼，QPR主場對錫周三先失一球下反勝2:1，為球隊鎖定勝局嘅係前英格蘭國腳安祖莊臣。睇埋個出場名單，仲有啱啱由馬賽回收嘅祖爾巴頓、前富咸箭頭森莫亞等，後備席仲有邊緣國腳諸如贊拿斯同胡禮菲臘斯，其實呢班人如果夠生性，踢英超都未必使降班啦！

領隊夏利叔日前表明會繼續增兵，爭取升番上英超，有傳佢斟緊契仔迪科爾來投，家陣陣中個個都要為正選而戰，點敢揸流攤。再者聯賽啱啱開咧，英聯盃對弱旅正好係練兵好時機，力奇好相信夏利叔會派強陣出戰。

埃克塞特喺英乙開咧戰總算凱旋而歸，不過講到底實力始終低兩班，當日射入致勝球嘅森柏堅，上季都只係効力蘇超弱旅聖美倫，實力有幾多唔使多講，埃克塞特要靠佢搵食，真係信唔過囉！