曼城做壇大龍鳳

猪拉多纳

紐卡素作客不設防

昨日曼城領隊文仙尼公開「扯白旗」，話本季英超冠軍已經屬於曼聯，承認衞冕失敗。雖然係咁，但細鬼相信班球星落到場一樣想贏，因為唔想做壞個名嘛！今輪主場迎戰紐卡素，撞啱對手有高洛仙尼等幾員後防大將缺陣，可吼大盤！

（有線300及200台周六晚11時直播）

曼城今季歐聯早早出局，聯賽又落後緊畀死敵曼聯幾條街，分差大到連文仙尼都無顏面死撐落去，惟有死死氣認衰。現今社會興問責，件事搞得成就好哋哋，但如果失敗就要搵人負責，特別係曼城呢間「大公司」，老細更加要搵人孭鑊；睇嚟就算季尾贏得足總盃，文帥下季都好難有得撈，依家每一場領軍都係佢嘅倒數。
文仙尼進入倒數

雖然上季奪得英超錦標，但文帥一直未躋身為世界頂級領隊行列，佢不但陣上調兵能力一般，又搞唔掂更衣室內嘅問題，結果手揸一副好牌但未能好好發揮。奉勸曼城及早換帥，唔係都幾難再同曼聯爭天下。

雖然英超基本上已經冧莊無望，但作為職業球員，落到場都應該盡力爭勝，今次曼城仲有主場之利，相信泰維斯等攻擊球員又可以騷哥利。紐卡素傷兵名單好似水蛇春咁長，中堅高洛仙尼、左閘大衞辛頓、門將告魯爾、中場迪奧迪全部唔出得，今場想守都守唔到，所以捧大盤最啱數。