華倫乘機吸血

猪拉多纳

皇馬聯賽冇mood砌

今晚西甲重量級大戰，華倫西亞喺「蝙蝠洞」布下天羅地網，迎接起伏不定嘅皇家馬德里。雖然上周中西班牙盃皇馬向華倫派咗兩蛋，但主客互調下，情況截然不同，加上「銀河艦隊」後防不整，內訌頻仍，教練莫連奴同C朗吵晒大鑊，作客仲要讓到半一咁多，實在過晒火位，一於捧下盤。

（now 632周一凌晨4時直播）

上周中西盃八強首回合，皇馬主場贏華倫2比0，但表現唔算突出，西媒《阿斯報》更爆出，話莫帥賽後怨C朗經常甩波唔回防，後者反駁話我入波嗰陣，又唔見你叫我回防，莫帥即刻叫佢滾，兩人愈鬧愈大聲，幾乎打埋交添！連兩個最親密嘅葡萄牙人都吵大鑊，可見皇馬內訌問題有幾嚴重。皇馬後防依然傷兵滿營，兩大中堅比比同沙治奧拉莫斯一傷一停，莫帥可能要用番卡維奴夥拍艾比奧爾扼守中路，前者年事已高，後者久疏戰陣兼轉身慢，旨意佢兩個真係蛇都死。
皇馬留力西盃

更重要係，皇馬喺聯賽已落後榜首巴塞18分，要從後趕上機會極渺茫，倒不如慳番啖氣，留力爭西盃同歐聯好過。相反，華倫於聯賽仍要爭歐聯席位，佢哋依家只差第四貝迪斯4分，唔係冇得追，「蝙蝠兵團」今季主場取得11勝2和2負，曾經擊敗強敵馬德里體育會，況且射手蘇爾達杜弗爆，面對問題多多嘅皇馬，受讓半一筍到爆，斯維強捧下盤。