高清睇跑馬：龍船旺形勢大好

港陌

　　「小鬥士」上季九戰全敗，今季操練亦未見搶鏡，但上仗於開鑼日第一場田草五班1200米，突配頭罩兼用柏寶執韁果然有料到，排七檔出閘迅速，鞍上人輕騎兩步決心搶放，但內檔有隻「瀟洒威龍」， 故未能進佔內欄， 而第二段快至22.5，可見步速不慢，但「小鬥士」入直路猶有餘勁，甚至差點殺退大熱「上浦駿將」，便知這席亞軍了不起。拼後唞了八日復課，期間曾作快跳及試大閘，收復失地的決心相當明顯，既然方嘉柏於谷戰經常得心應手，縱檔劣亦值捧。

　　另外，「龍船旺」於07/08年馬季初出即勝並贏三個幾馬位，質素幾高你知我知，可惜之後健康有事，第二季未能多跑多操，但尚有本事初跑谷草即建功，再次證明實力唔差；後來由蔡廐過檔安廐，上季能密密跑算是健康理想，弊在得個近字，結果幕後決定再次轉倉。

　　今季「龍船旺」交由沈集成打理，首戰出爭田草1000米即得第二，除頭馬「好旺寶」太勁外，再講本身季內初出狀態未算好，亦要去到末段才撻得着，仍能上名至少肯定已重拾鬥心；今次轉戰谷草1200米勝途，排四檔形勢大好，穩膽。

Sam