高清睇跑馬：喜勁飛重振雄風

港陌

　　「喜勁飛」上季一開首連贏三場，總場次116跑1400米，齋跑一條直路贏晒，尚要輕取打吡盟主「極品絲綢」；接戰總場次166跑1600米繼續留前鬥後，爆發超強後勁，仲要收韁贏馬造出快時間；到了總場次238續跑1600米，有兩大吸引地方，第一係全程跟在中叠，不似之前次次留到最後，跑法大有進步，第二係負頂磅照贏。正因為三仗贏來輕鬆，至總場次337出戰香港經典一哩賽，就算評分全場第二低一樣被熱捧，可惜跑來乏善足陳，但睇番其拼後受傷，甚至要提早唞暑，經過多月努力，上季尾已經復課，今季更操得，試了兩課大閘都後上如箭，質高好馬傷愈復勇，周五角逐一班1600米，應可重振雄風。
　　
　　「好旺寶」來港三季有多，蔡約翰用盡方法堅決保留，「好旺寶」果然冇令佢失望，上仗千呼萬喚始出來即贏馬，今季總場次037跑田草1000米，捧場客不多，就算強配韋達又排靚檔，一樣有十一倍好分頭，出閘反應相當好，之後輕鬆守在前列位置，最後三百米開始推騎，起初反應未算強，但取得平衡後愈衝愈勁，三兩吓手腳已追過所有對手，更因為走勢強勁，韋達知已穩操勝券，只作推騎，未有打過一鞭，甚至拉士五十米已收韁，亦因姿態超級而被評磅員重加十分之多，周五上三班仍跑1000米，再贏冇難度。

Sam