神力金剛韋達泊啱碼頭

魑魅魍魉

世界盃八強戰昨晚展開，然而香港冠軍騎師爭持亦非常激烈，明日韋達與柏寶兩位好手有十場賽事同場較技，其中第二場韋達季內第二次得葉廐支持，騎「神力金剛」出爭，早前騎練季內首次合作的「千兩寶寶」拚入季席，現階段趁住柏寶同阿航唔多咬弦，韋達把握時機泊埋呢個大碼頭，此消彼長此道理好簡單，爭取更多支持，贏多一兩場過柏寶頭，話都冇咁易！
       
神力金剛
初跑五班到位

昨晨韋達第一課過檔「神力金剛」，於大圈快試三段，鏡頭非常矚目，廐主葉楚航於人馬出圈前從容跟貼並畀指示，轉頭再倚欄舉鏡兼打錶，其後韋達更專程到烽火台搵阿航匯報，連徐雨石都忍唔住坐埋嚟打探軍情，動態甚為緊張。「神力金剛」賽績雖然係0比11，但明日初次落五班刻意轉跑田草直路賽，隨時由大紅人韋達開齋。