高清睇跑馬：騰雲駕霧守尾門

魑魅魍魉

　　今季總場次664田草四班1400米﹕「一言為定」雖然首戰一出即勝，但始終初跑同程，加上排十二檔及配何澤堯，臨場居然仍捧成兩倍大熱，可見信心爆棚。出閘後居於尾列，轉彎中段已移出二叠，入直路再拉出外檔衝刺，由於馬匹走勢不穩，何澤堯僅作推騎而未有打鞭，結果仍逢馬過馬取勝，末段更收韁過終點，難怪賽後被評磅員重加十分﹔後勁凌厲之馬，這次跑多二百米必更合發揮，換上柏寶篤定連捷。

　　總場次667田草三班1400米﹕「騰雲駕霧」出閘迅速，沿途貼欄跟住「不老精英」﹔入直路正欲拉出外叠望空，卻因多駒在外冇位出，騎者只好繼續在內檔角逐，但前面被「希望之星」頂住去路，之後再想走出外叠，又被「駕寶」封殺﹔過了不久「希望之星」走入內檔，何澤堯即策馬於中間位置殺上，但又被斜跑的「蓬萊仙子」挨碰，終點前「騰雲駕霧」一直未能完全望空，結果後上不及跑第二。今日「騰雲駕霧」又跟前駒碰頭，鞍上人換成柏寶威力大增，可食尾胡。

Sam