高清睇跑馬：勁信心磅輕再捷

魑魅魍魉

　　今季總場次625田草四班1200米，「駟馬難追」首次加眼罩作賽，出閘唔算快，但迅即跟守前列，跑來極之搶口，尤其是轉彎早段，就算梁家俊揪到實，一樣頭岳岳，尚幸二檔起步，前面及外邊都有遮擋，直路逐步移出外檔，過了三百五十米，於「龍得風雲」外側望空，反應不俗，但跑來依然欠規矩，嚴重外閃，跟住內閃，騎者轉打右手鞭仍難操控，難得仍可殺退接戰補中的「龍得風雲」跑第二，頭馬「川河勁駒」再出繼續輕勝。「駟馬難追」今次易配韋達再戰同程，出頭有望。

　　另於季內總場次645田草四班1200米，「勁信心」出閘後杜利萊騎兩步反應良好，一度放出，然而有違原訂戰略，故此稍為留後，讓「覓得寶」放出，「勁信心」留守黃金包廂靚位，居第三位，但因此被困遲遲望空，直路被「覓得寶」及走二叠的「勁辣椒」封住去路，杜利萊無計可施，惟有等到了三百米處，「勁辣椒」腳軟移出三叠，騎者見此即取二叠空位衝刺，遲了發力，不料「勁信心」撻着後愈追愈勁，三歲馬負一三○磅照贏，絕對係高難度之作，周日重遊舊路，於三班負輕磅，連捷望濃。

Sam