馮諾嘉手記：韋達有鬥志 同歡笑鍊盡

魑魅魍魉

　　早前葉楚航講明今季唔會再用柏寶，皆因自從柏寶一月中喺谷草1000米替「三和之星」建功後，足足有成五個月再無為練者贏馬，柏寶呢頭畀人放棄，嗰頭即刻有人支持，方嘉柏擺明車馬力撐，上次賽日方廐有八匹馬由柏寶操刀，結果騎練雙雙揚威。葉楚航唔用柏寶，有啲馬改由韋達執韁，嚟緊當然會有更多合作機會，而支持韋達嘅仲有其他人，今次就有告東尼，練者今季同韋達嘅合作，已經要數到上年十二月嘅「牛精富星」，今次第三場四班1400米「同歡笑」就畀咗韋達騎。現時柏寶已帶離成九場頭馬咁多，韋達要再奪冠軍騎師實在唔易，唔通告東尼都想做韋達靠山﹖

　　「同歡笑」（圖近欄）季內跑1400米獲一冠兩亞，上賽喺蔡明紹胯下放頭跑，最終輸畀超班馬「一言為定」（圖近鏡）跑第二，走勢一啲都唔曳，既然狀態回勇，今場搵得韋達，七歲馬搏得實搏，加上抽得三檔好位，可以做膽。

　　韋達一向都係百足咁多爪，睇番周日十一場賽事，柏寶得八匹坐騎，韋達就場場爆滿，第二場四班1200米，佢騎文家良馬房嘅「駟馬難追」，呢匹馬今季已有兩場屈居第二，前仗跑同程水準最高，只係輸畀超班馬「川河勁駒」，對手之後再出再贏，蔡廐睇得好高，有人話係第一班馬，「駟馬難追」跑第二絕對唔失禮，今次強配韋達，當然係想打開勝利之門，要支持。