高清睇跑馬：上海先鋒增程好

魑魅魍魉

　　今季總場次588四班田草1200米，「上海先鋒」出閘唔快，但在杜利萊積極推騎下進佔第三位，留守黃金包廂位，不過由於早段推騎上了口，因此中段搶口，更弊入到直路早段，「勁辣椒」力弱墮退，外側「大把在手」亦衝刺平平，因而被兩駒封了去路，直至三百米才可望空，重磅馬遲望空固然吃虧，而且衝刺時一度內閃，杜利萊要作出修正之餘，也要轉用左手鞭，所以遲遲先可撻着後勁，難得最後一樣追到季軍，僅以馬頸位之差飲恨，表現極之出色。今戰牠增程角逐1400米，有力後上將對手一網打盡。

　　另外，總場次591田草四班1400米，「愛拚者勝」轉投告廐首次出賽，閘前由十倍打到六十七蚊開跑，起步反應一絕，拍住前速極快「萬事歡」齊齊彈出，楊明綸沿途留守在二叠第四位，轉彎尾段多駒推騎，牠依然大把在手，莫講推騎發力，甚至抽實之下已進席第二位，入直路稍為走出外叠已望空，推騎之下反應強勁，輕鬆彈甩群駒，贏逾四個身位，而且跑出一分廿二秒五，此乃當日四組同程最快時間，甚至較三班頭馬「高手」快近六線，可見實力超四班，明日轉戰泥地可照贏。

Sam