朝早有動靜：賀賢跟實軍旗

魑魅魍魉

　　昨朝周五課期，賀賢馬房旗下多匹參戰馬均快磨考驗，練者亦一早到場督師，動態頗為積極，「勝利旋峰」及「快利多」由柏寶考驗，「軍旗」（圖）則在王志偉胯下出試，戰馬在機坪行踱熱身時，練者已在旁睇到實，出試前先向柏寶、王志偉作出指示，才安排人馬出跑道，隨即往烽火台二樓食胡位觀操，操後再回到沙圈與兩位騎師會合，一齊睇馬匹操後反應，並密斟一番，期間動作多多，擺明係搏殺格。

　　事實上，賀賢近期舉動確實比前積極得多，戰馬之中，列陣第十一場二班1400米之「軍旗」，最值得留意。昨課由王志偉跳兩段，操前操後練者一直貼身跟進，緊張之情表露無遺。此駒來港後首戰排大外檔，形勢不利，竟可後上如箭取勝，可見實力絕不簡單，拼後休息足夠，體力完全恢復，昨晨試來步伐急勁，火氣更旺盛，走勢更銳利，此番升班負磅減輕，有力挑戰一眾強手，若有分頭，更值得一敲。

柏寶重視勝利旋峰

　　至於第八場三班泥地1200米的「勝利旋峰」，由胡廐來投之後已跑過兩場，上仗角逐泥地賽1200米，沿途採前跟戰略，只敗在泥地怪傑「時時攞彩」蹄下取得第二，表現令人刮目相看，今次由柏寶操刀，騎者正是「時時攞彩」之贏馬功臣，今次肯為「勝利旋峰」執韁，機會如何自是心中有數，大可為賀廐贏馬省招牌。　

韋柏