賠率有路捉：愛拚者勝信心爆棚

魑魅魍魉

　　第五場「愛拚者勝」自從○八年六月後，差不多兩季未贏過，上季尾轉咗去胡森馬房後十三戰只得兩 P，今日轉大告馬房初出，睇得出幕後好恨贏。睇番噚日早飛，居然係62蚊次熱，位置更係14蚊大熱，信心十足。唔善忘嘅馬迷應該仲記得早前大告隻「靚到爆」又係熱透下取得轉倉首捷，若然「愛拚者勝」今日繼續熱透，好大機會係「靚到爆」翻版。
　　
　　第二場「飛魚駿王」上仗個第七，認真令人失望，今戰仲要面對「大把在手」同「上海先鋒」兩匹上仗跑得唔錯嘅質新馬，真係冇諗過熱到得33蚊大熱門，好明顯唔係普羅馬迷買落去，有人預計佢今戰回師草地會交出截然不同表現喇。
　　
　　騎師王方面，柏寶最近兩期熱門死火，相信嚇走唔少捧場客，睇佢今日手馬「覓得寶」、「好運精選」、「創先機」、「新領袖」、「福到財星」同「軍策令」都穩位望贏，大熱應該食得出。

周仲