馬主論戰

魑魅魍魉

吼實蓬萊仙子

　　告東尼今日派出明星馬「萬事佳」上陣，估計應該有其他廐侶配合攻勢，最啱心水係第九場「蓬萊仙子」，今季唔經唔覺已經贏咗三場，頭馬全部響 1400米取得，擺明路有專長，睇番上場依然贏得好輕鬆，擺明仲有分在手，再跑強項一定要吼實。

　　另一匹東廐馬鍾意「快人快語」，雖然衝擊打吡失敗，但睇番外地已經跑至2400米，話唔定大長途至啱發揮。今次吼準2400米皇太后盃先至報名上陣，配普萊西一定乏人問津，隨時爆得。

任達華

電訊高星必拼

　　聽日就係母親節，我嘅大姨丈同大姨媽專程響三藩市返咗嚟一齊慶祝，由於佢哋都好鍾意賽馬，所以今日將會同佢哋一齊入場睇跑馬。而我哋隻「電訊高星」今次亦有份上陣，呢隻馬唞咗一輪，用何澤堯減磅上陣，希望跑得好喇﹗

　　另外一匹心水係尾場「火龍駒」，熱身一場後轉跑沙田大場，隨時會有唔同演出，一定要吼實。至於第五場「雄心馬主」都有留意價值，已經打叠兩場上名，六歲馬近期狀態好弗，遇上一群弱旅有權偷雞。

張敬山

五代同堂放到

　　十磅仔何澤堯雖然未能夠一鳴驚人，但係陣上演出都算有板有眼，今戰佢都有唔少坐騎，話唔定可以打開勝門。先推介頭場「五代同堂」，近兩場跑 1400米獲冠亞各一，演出夠晒準，今次再跑此程話唔定可以放到。

　　另一匹要留意嘅何澤堯坐騎，係尾場嘅「綠色駿駒」，上場加眼罩效果平平，今次即刻除咗呢樣配備，後勁特強嘅馬今次增程跑1800米，照計更加啱佢嘅後勁發揮，有望取得來港後第二場頭馬。

梁廷鏘