馮諾嘉手記：龍得風雲分利反彈

纯情小彩迷

　　自從馬會今季增加轉播海外賽事後，馬迷多咗機會睇到世界各地唔同嘅賽事，今晚嘅杜拜世界盃賽馬日就吸引到唔少馬迷留意，皆因港隊有成三匹馬遠征，當中告達理佔兩駒，分別係「時尚風采」角逐1200米阿喬斯短途錦標，「好爸爸」則出戰1800米杜拜免稅店盃，大摩亦有「同一世界」參戰1200米金莎軒錦標，三匹馬今次都抽到不俗檔位，當中以「好爸爸」勝算最高，季內勝出香港一哩錦標，上場扳到2000米香港金盃亦跑近，取得第四名，狀態雖然並非最當銳，但絕對有能力贏今次盃賽，為港爭光。呢五場杜拜世界盃賽馬日賽事，頭場今晚九點四就開始，唔算太夜，大家當然要睇支持下港隊喇！

　　第二場四班1200米，用「龍得風雲」做膽，由三班落到嚟四班，評分歷來新低，上場泥地1200米開始跑近，輸兩個幾馬位得一席梗頸四，回師田草1200米抽得二檔有利，加上對手甚弱，隨時可以反彈，配腳拖上場跑近嘅「聚有盈」、抽得一檔有利嘅「勁辣椒」同今場落班再戰嘅「夢寐以求」，四連環揀多匹負輕磅嘅「快都」。

　　第六場四班1600米，用「福到財星」做膽，上場跑谷草一哩後上吸引得第四名。雖然今次回師沙田，對手實力較強，但此程曾經跑近，今回強配韋達，負輕磅有利，可望開齋。配腳有上場同程跑近嘅「連利威勁」，以及上場同程一放到底嘅「名人」，「喜綵」季內同程亦多番入位，今場二檔有利，強配柏寶要拖，四連環揀多一匹潛質不俗嘅「幸運來」。