馬房秘聞：黎海榮贏馬賀喜

不死鸟

▲何良對上一場頭馬係五月一日勝出「好先生」，馬主史立德將於今晚響馬會會所擺慶功宴，而聽日尾場「賀喜」嘅馬主郭裕華由於係馬主史嘅好友，所以亦會到場一齊慶祝。講開「賀喜」，呢隻馬來港後跑過三仗，已開始適應水土，馬房對今仗亦寄望甚大。雖然「賀喜」連續三仗配黎海榮落敗，但馬主郭對騎者仍充滿信心，並不打算換人，若然黎海榮今次能夠幫「賀喜」打開勝門，一班馬房手隨時又有慶功宴食。

　　▲「大旋風」上仗賽前曾三度交由柏寶試大閘，但只跑獲第六名，幕後亦勉強收貨，事關匹馬始終作戰經驗少，臨場緊張以致多汗，體力受影響之下自然落敗。

　　賽後柏寶本來打算再騎，但由於要騎「蓮華生輝」遠征新加坡，以致未能分身，令馬偉昌冷手執個熱煎堆。再講馬偉昌近期已頻頻替葉廐馬建功，今日呢匹「大旋風」真係唔可以睇小。

家家興旺千八掂

　　▲講開葉廐馬，「家家興旺」上仗響田草千六米後上贏馬，賽後杜利萊向練者報告，呢隻馬出腳愈來愈慢，建議下仗再出要報跑千八米，結果航哥接納建議，今仗真係安排此駒增程跑千八，若然阿萊嘅判斷正確，呢匹馬隨時可以再贏，值得追多一次。