托迪願續約 羅馬當旺再追

猪拉多纳

一個夏天有3件主力離隊，試問有邊個估到羅馬嘅表現仲掂過上季吖？開季連贏兩場嘅「雌狼」今晚喺意甲獨腳戲造訪帕爾馬，意大利媒體收到風，「羅馬王子」托迪計劃續新約踢到收山，淨係呢單利好消息都足以振奮軍心，作客小讓仲未開齋嘅帕爾馬平半，1.99倍上盤捧得過吖！

（開賽時間：周二凌晨2:45）
「雌狼」生力軍對辦

馬昆奴斯哥利亞、拉美拿、奧斯華度相繼離隊，以為羅馬元氣大傷？咁你就錯嘞，羅馬開季連環砌低利禾奴同維羅納，一班生力軍好似門將迪沙迪斯、中場史杜特文、拿積同前鋒謝雲奴不知幾對辦，當中迪沙迪斯開咧兩仗都保住清白之身，拿積更被大讚完美填補拉美拿離隊之後嘅空缺，新帥魯迪加西亞真係應記一功。
帕爾馬中後場傷兵多

賽前有消息指羅馬嘅美國班主柏路達即將飛嚟意大利，特登同托迪傾續約，據講「羅馬王子」初步答應續約兩年，計劃留隊留到40歲「安享晚年」，Fans同隊友都肯定開心到爆！對家帕爾馬喺開鑼戰咬唔入基爾禾，上仗全場捱打輸畀烏甸尼斯1:3，後衞柏列達同中場加路柏仲養緊傷，成隊得個回晒塘嘅卡斯辛奴同阿馬利孭飛，邊似會惡得出樣吖！