心跳鋒線撻着 鯨魚焗攻做「大」騷

猪拉多纳

今日嘅日職頭場有好戲上演，清水心跳喺主場對名古屋鯨魚，1.65倍入球大最抵玩。自從射手大前元紀以外借身份回歸，最近心跳嘅鋒線就重新撻着，撞啱鯨魚防守中場丹尼爾施華停賽，中堅田中鬪莉王復操後再傷，焗住鬥攻開入球騷好正路。

（有線64及203周六下午2:00直播）
大前元紀回歸有料到

開季前轉投杜塞爾多夫嘅大前元紀，上季為心跳攻入13個聯賽入球屬於隊中首席射手，可惜佢喺德國上陣機會有限，而且成日喺twitter暗示踢得唔開心，結果心跳嗌佢回歸即刻成事，對上2場佢唔止自己有波入，仲帶挈舊拍檔高木俊幸翻生，新加盟嘅列當錫更生猛，淨係靠佢3個都夠開入球大啦！
鯨魚田中鬪莉王復操又傷

另一方面，雖然鯨魚有中鋒約舒亞堅尼地為澳洲踢完國際賽歸隊，可惜丹尼爾施華要停賽，而且田中鬪莉王日前復操又整親，要知道鯨魚今季原本已經防線不穩，家陣冇埋兩大支柱，唔使旨意保持清白。

不過同時間，佢哋最近都有前鋒永井謙佑離開標準列治以借用身份歸隊，既然兩隊位列中游冇包袱，整場入球騷益吓球迷好過啦！