阿仙奴大眼仔做齣好戲

猪拉多纳

上星期轉會市場終於結束，而我嘅愛隊阿仙奴領隊雲格亦做咗場好戲，成功引入咗奧斯爾，我相信佢一定可以幫阿仙奴贏取冠軍，勝利就由今周作客新特蘭開始吧！

呢位德國中場好波唔在講，佢喺場中帶起成隊波先至係最架勢呀，大家見佢之前喺皇馬嘅表現就知啦！依家過到嚟兵工廠，肯定幫到左右兩邊嘅辛迪卡索拉同禾確特，加上有法米尼打防中，奧斯爾就可以全力策動攻勢，希望之前三場都有波入嘅中鋒基奧特繼續有神勇嘅表現啦！

（now 622周六晚10時直播）
「25球王」呼之欲出

其實講起阿仙奴一直以來嘅轉會問題，呢幾年都成為笑柄，差不多每位離開阿仙奴嘅球員都即時奪冠，好似前季有拿斯尼喺曼城贏咗英超，法比仔亦為巴塞隆拿捧走西甲，甚至「神丹」丹尼遜返巴甲都有冠軍落袋。

但咁多單轉會中，最令廠迷有印象都要數到一位「25球王」，佢拎過足球先生，攞過英超金靴，更曾經被稱為亨利嘅接班人，當年廠迷個個都咁錫佢，點知佢就為錢轉會另一英超大會，激到阿仙奴迷紮紮跳，真係名副其實「二五仔」。

來緊「25球王」話自己會重拾射門鞋，要做番球會射手，但佢隊波今年買人買到開巷，周六有冇得出場都未知，究竟呢位「25球王」係邊個？星期五晚嘅《球分》節目入面大家記得留意喇！VT go！

（now 101周五晚10時30分直播）