西班牙二線兵夠大智利

猪拉多纳

雖然世盃外圍賽烽煙四起，不過衞冕冠軍西班牙偷得浮生半日閒，今晚只係假瑞士搵嚟南美球隊智利拍跳，「鬥牛國」主帥迪保斯基鍾意喺熱身賽大輪換，一眾二線球員如辛迪卡索拉、尼格度難得有機會擔正，必施展渾身解數博上位，智利冇壓力之下亦唔會縮，阿King認為1.72倍大盤值博。

（周三凌晨2時開賽）
智利火力猛鬥駁火

由於今仗對智利只係熱身賽，西班牙主帥迪保斯基通常會畀「巴塞幫」恩尼斯達、沙維、法比加斯等休息，不過你唔使替迪帥擔心，因為佢麾下大把猛人，好似今季齊齊過檔曼城嘅尼格度及捷西斯拿華斯，真係弗到漏油，上仗世盃外作客惡戰芬蘭，兩人後備入場立即有貨交，合力炮製埋齋波鎖定勝局，延續喺英超嘅強勁勢頭。

雖然阿仙奴核心辛迪卡索拉喺西班牙屬冷板常客，重要賽事冇佢份，但卻係迪帥嘅熱身賽愛將，呢位萬能老倌亦好珍惜每次出場機會，過去10次於友賽披甲狂轟6粒，態度正確，今仗又係佢喺迪帥面前爭取表現嘅好時機。

智利一向進攻大過天，由外流球星維達爾、阿歷斯山齊士、伊度亞度華加斯組成攻擊線火力唔嘢小，今仗冇乜心理包袱，隨時同「鬥牛國」合演入球騷，大盤咪錯過。
盧森堡唔赦殘陣北愛

至於世盃外歐洲區F組北愛爾蘭作客盧森堡，前者除咗中場布拉特同前鋒拉菲迪要坐波監外，占美禾特及沙恩費格遜亦肯定因傷倦勤，連艾朗曉士、麥基雲及卡夫卡特等均受傷患困擾，傷兵一大籮點踢呀，盧森堡可藉地利之助偷到雞，受讓抵玩。最後歐洲區A組馬其頓一向靠主場搵食，近6次喺自己地頭出戰贏5次，遇上作客腳軟嘅蘇格蘭，主勝手到拿來。