卡馬達馬尼反撲市原

猪拉多纳

日本丙組仔專釣大鱷

日本天皇盃係爆冷溫床，上季喺第二圈已有唔少令人意外嘅戰果，睇勻周日咁多場波，最鍾意JFL（日本第三級別聯賽）一哥讚岐卡馬達馬尼，佢哋會造訪日乙名牌球隊千葉市原。市原掛住爭升班，勢派副選敷衍了事，蘇豪博「讓球客勝」！

（周日下午3時開賽）

日本職業足球聯賽下年會有新變化，賽會已經拍板搞J3聯賽取代JFL成為國內第三級別聯賽，暫定有十二隊參賽名額，合資格參賽隊伍會喺年尾公布，日職官網都整定個J3準備室版面。

讚岐卡馬達馬尼嘅日職「準加盟申請」已獲批，呢支JFL一哥若能保持水準，有望取得升班席位，下季直頭可以踢日乙。讚岐射手西野泰正同高橋泰本身都有日職經驗，大軍人腳其實唔曳，今次越級挑戰強敵絕對有得揮！
市原派後備讓唔起

千葉市原係日乙前列球隊，陣中擁有曾効力愛華頓嘅甘比斯及日本球星森本貴幸等星級射手，星味同實力都在讚岐卡馬達馬尼之上。不過，踢波唔係齋講實力，幕後人意向都好重要，市原以重返日職為首要任務，未必會喺天皇盃搏盡。據日本傳媒報道，佢哋今戰應會派副選上陣，現年十九歲嘅中場小將井山遙也都有機會披甲。讚岐上屆於第二圈越級踢走鳥棲砂岩，今場市原主Ｗ有1.63倍明顯熱唔透，似乎捧受讓嘅讚岐卡馬達馬尼較穩陣。