南非生死戰喪攻「博」出線

猪拉多纳

世盃外非洲區A組今晚會進行最後一輪賽事，南非目前以2分落後榜首埃塞俄比亞，想出線的話，今日主場對博茲瓦納唔贏唔得。雖然南非出線形勢被動，但教頭恩格辛迪講明無論埃塞俄比亞半場領先3粒抑或落後3粒，今場都會喪攻90分鐘，1.75倍「讓球主勝」咪走寶。

（開賽時間：周六晚9:30）
博茲瓦納作客6連敗

當然，卡爾萬唔係知道恩格辛迪咁講就盲舂舂捧佢哋啦，從南非大軍名單所見，除咗有門將古尼、後衞馬斯利拿、中場舒巴拉拿及前鋒班納柏加組成嘅「凱薩酋長骨幹」之外，仲徵召咗唐卡士打孖寶古馬奴同富文等8名外流兵，經驗、默契及質素瓣瓣有，最終出唔出到線就唔知，但係要炒起博茲瓦納簡直易如反掌。

至於博茲瓦納家陣手執7分，如果埃塞俄比亞輸波兼且自己砌低南非，佢哋都有機會出線，不過難度系數就爆晒燈。講真，之前鬥埃塞俄比亞，若非對方派出唔符合資格嘅球員落場被判輸0:3，博茲瓦納依家有冇7分咁多都成問題，更何況呢隊波每逢作客都腳仔軟，已經連輸6場狂失13球，今晚仲要焗攻博晉級，防線隨時大穿窿，聽做炮灰啦！