英格蘭大傷鋒玩細

猪拉多纳

今晚H組賽事英格蘭主場迎戰摩爾多瓦，原本係強弱懸殊，但「三獅兵團」感染大傷「鋒」，先有朗尼退隊，史杜列治及迪科爾等射手亦受傷患困擾，面對摩爾多瓦奮力頑抗，隨時老鼠拉龜冇碇埋手，不如轉玩入球細。

（now 621周六凌晨3時直播）
朗尼退隊 史杜列治負傷

英格蘭鋒線多傷兵，曼聯前鋒朗尼因對利物浦賽前訓練撞爆額頭，迫不得已退隊，佢仲將受傷圖片擺上社交網，證明自己唔係詐傷。佢預計要抖三周，英軍冇咗呢位靈魂人物壓陣已經濕滯，但人衰行路打倒褪，開咧三場英超入三粒嘅紅軍箭頭史杜列治亦拉傷大腿，日前缺席操練，連熱刺射手迪科爾亦告受傷，由於下周要作客出線勁敵烏克蘭，老帥鶴臣為安全起見，未必會讓兩人喺今仗搏殺，前線得番韋碧克及列基林拔可用，攻力大打折扣。

弱旅摩爾多瓦有自知之明，一定擺出血肉長城迎敵，佢哋曾經打和波蘭及烏克蘭，僅輸黑山一粒，今仗入波都係一球起、兩球止，大細中位數提升到3.5球，捧細好路。