法蘭克福兵疲益晒多蒙特

猪拉多纳

拜仁喺上周中聯賽失分，對上季輸畀佢哋25分嘅宿敵多蒙特嚟講，今場波就係拉開分數，拋甩拜仁嘅大好機會！查實小弟覺得「蜜蜂兵團」嘅新兵表現相當搶眼，整體實力比上季仲有增無減，射手羅拔利雲度夫斯基被加薪挽留後，同上季一樣咁勇，今場對住實力低兩班嘅法蘭克福，開2.12倍「讓客」絕對冇問題！

（有線61、64、201及203、中央5台周日晚11:30直播）
奧巴美揚拍羅拔仔勁得人驚

多蒙特開咧3戰全勝，依家排喺聯賽榜第一，被譽為全德甲速度最高嘅奧巴美揚，拍住當紅前鋒羅拔利雲度夫斯基，中場又有「阿美尼亞球王」米希達利恩同馬高列奧斯派牌，呢個中前場陣容，絕對唔輸蝕畀拜仁嘅黃金組合，就算防中根度簡受傷要抖成個月，多蒙特今場要贏波都游刃有餘。

法蘭克福上星期贏布倫瑞克，卒之攞到新球季第一場聯賽勝仗，不過佢哋上周中先應付完歐霸盃，今晚係佢哋10日內第4場比賽喇！你估佢哋係曼城、拜仁或者多蒙特咩！法蘭克福人腳根本唔充裕，用嚟用去都係嗰班人，話冇疲態就呃你嘅啫！
10日4戰 中場兩將打埋柴

咁都未算衰，正所謂屋漏兼逢連夜雨，最大鑊係法蘭克福一對中場阿歷山大希恩同桑尼傑圖仲養緊傷，今晚肯定唔使預佢哋兩個，想變都冇得變，今鋪迎戰多蒙特，破到蛋都要還神咯！
頂占筍盤：多蒙特（讓球客勝）

有線球彩台主持阿占

電郵：soccer64@cabletv.com.hk

面書球彩專頁：http://fb.com/icable64

PHONE波熱線：1831 678

「快樂星期天」開放時間：周日晚9:30至凌晨1:30