富咸老將莫氣守唔住紐記

猪拉多纳

今晚英超紐卡素主場鬥富咸，兩隊周中喺英聯盃分別作客乙組仔，「喜鵲」收起多名主將，憑艾美奧比兄弟入波輕鬆晉級，相反富咸派出柏加等主力落場，搏足兩粒鐘靠射贏12碼出線，今場緊接北上遠征，呢班老將隨時莫氣，一於揀「喜鵲」1.98倍主勝。 （now622台周六晚10:00直播）
30+後衞周中打足百二分鐘

「喜鵲」喺英聯盃作客摩甘比，首席門將告魯爾留守大本營，安尼達、大衞辛頓全程做後備，賓艾化、穆沙施素高亦只係後備落場搏得廿分鐘左右，教頭柏杜留力聯賽意圖顯而易見。雖然被罰停賽3場嘅中堅史提芬泰萊繼續作壁上觀，但恩加麥比華近兩場移入中路表現稱職，再配合養精蓄銳嘅柏比斯施斯喺前線數胡，今場有力敲響聯賽勝鼓。

富咸作客伯頓90分鐘打和1:1，加時2:2，最終12碼險勝5:4，防線唔多穩陣之餘，後防核心懷斯、軒治蘭特、艾朗曉士同新援柏加打足百二分鐘，佢哋個個年過三十，面對頻密賽程難免吃不消，何況門將史基倫堡喺揭幕戰受傷後至今未康復，由大衞史托達把關始終令人信唔過。