富咸態曳兵疲冇瓣掂 紐卡素開齋係時候

猪拉多纳

富咸剛於英聯盃作客乙組仔伯頓，領隊祖爾好有誠意，幾乎盡出正選應戰，但最後打足120分鐘射埋12碼先至過到關，整體演出極曳。大軍平均年齡唔細，事隔四日又匆匆作客紐卡素，「喜鵲」上次主場贏波正正係贏富咸，今次可斬多四両兼喺聯賽開齋！

睇番富咸陣容其實唔曳，貝碧托夫、柏加、加拉高尼斯、軒治蘭特都有卡士，但個個都一把年紀；前鋒拜仁雷斯係好波，但又嫌盤扭過多，又唔夠硬淨。以上幾個主力除「Hea碧」外，上仗對伯頓都有踢足90分鐘，僅抖幾日就要造訪聖占士公園球場，富咸客場戰鬥力將曳上加曳。
卡比耶復出鎮住

紐卡素陣中都有唔少傷兵，包括迪奧迪、約拿斯古迪利斯等，但中場大腦卡比耶能夠復出領軍。領隊柏杜已做晒嘢，呼籲球迷唔好因佢有意過檔阿仙奴而噓佢，相信班「鵲迷」唔係傻嘅，柴愛隊最好波嗰個台，唔通真係唔想贏咩？