利華三叉戟衝散史特加

猪拉多纳

德甲史特加主場迎戰利華古遜，上季聯賽三哥利華古遜今季得到南韓人氣鋒將孫弘民加盟後如虎添翼，鋒力更上一層樓，今晚作客有力攻陷防線中門大開嘅史特加，利華古遜小讓平半，黑柴撐上盤。

（有線64及203台周六晚9時30分直播）

利華古遜今季由希比亞獨挑大樑執教，首仗即輕取弗賴堡，身價千萬歐元嘅新兵孫弘民迅速融入球隊，首度登場即有「士哥」，配合上季德甲神射手傑斯寧同近況大勇嘅天才小將悉尼森姆，組成活力十足嘅三叉戟，喺前線互相走位恍如穿花蝴蝶，令對手防線疲於奔命，以利華目前強勁攻擊力，等閒德甲球隊唔易抵擋。

史特加雙中堅齊缺陣

史特加今季繼續由庸帥拉巴迪亞執教，依然一貫慢熱，首仗即落筆打三更輸咗畀緬恩斯，仲要畀棄將岡崎慎司倒戈入波剃眼眉，今仗雖然返到主場，但好不幸地一雙正選中堅尼達美亞同隊長泰斯治雙雙因傷缺陣，中門大開，要由利華自由轉會嘅二閘球員舒華比客串中堅，一來位置唔慣，二來利華一眾鋒將對佢弱點一清二楚，今晚都幾難頂得住前度球會嘅猛烈攻勢。