葡萄牙齋靠C朗讓唔起！

猪拉多纳

正所謂牡丹雖好都要綠葉扶持，今晚熱身賽葡萄牙主場迎戰荷蘭，C朗同尹佩斯兩代「紅魔牡丹」對決當然係焦點所在，之不過比較綠葉嘅話，賽前受傷情肆虐嘅葡萄牙真係輸咗成條街，荷蘭受讓，一於捧1.63倍「讓客」。（有線155周四凌晨3:30直播）

「中場雙核」打柴 拿尼傷埋
論近績，葡萄牙3連捷1球不失，計對賽往績，更加連贏荷蘭3場，今場被莊家秤先好合理。可惜吖，「中場雙核」魯爾梅利斯同摩天奴先後受傷退隊不特止，翼鋒拿尼亦都傷埋，除咗組織攻勢大受影響外，冇佢哋幫手走位拉空，C朗發揮亦隨時被局限。

相比C朗得啲殘葉做襯托，尹佩斯呢株荷蘭牡丹就好得多，除咗喺社區盾梅開二度狀態大勇，「頂級綠葉」亨特拉爾、洛賓全部當弗，配合史杜特文、雲堅基爾呢班後起之秀爭上位，進攻火力唔講得笑，再者領隊尹戈爾踢走史奈達後，尹佩斯今場紮職做隊長，當然唔能夠失威！