奧帥保飯碗白禮頓大騷救駕

猪拉多纳

英冠啱啱開季，但白禮頓領隊奧斯卡加西亞已被逼到牆角，主場勢同打比郡鬥大！白軍今夏無喇喇辭退領隊普耶，除將惹官非外仲搞到軍心不穩，開咧戰績曳，奧帥已感到壓力，主場必定喪攻立威，咁啱對手「綿羊」狀態佳唔赦「海鷗」，吼大！（周六晚10時開賽）

白禮頓上季殺入前六打升班附加賽，而且於盃賽又有亮麗演出，領隊普耶已被公認為英冠其中一名有料教頭。但因為同高層唔啱牙，「海鷗」決定請佢食無情雞，普耶慶到要告白禮頓。普耶一向極受「海鷗」球員擁戴，現時西班牙籍主帥奧斯卡加西亞經驗不足，開咧戰首先不敵列斯聯，上仗英聯盃更被乙組球隊淘汰。為保飯碗，今仗對奧帥嚟講非勝不可，肯定強攻。

ＱＰＲ強勢添食
打比郡一向係中游部隊，領隊尼祖哥洛夫崇尚進攻，開咧後一勝一和，今場唔怕同對手鬥攻，捧大啱數。另一戰布力般流浪主場鬥諾定咸森林，布力般狀態沉遇強冇運行，平手盤撐客軍；昆士柏流浪（ＱＰＲ）大超班，作客讓得起哈特斯菲爾德平半。