劉舜文：拜仁易帥多變數

猪拉多纳

加盟東方波經 同黑柴雙劍合璧
「有線德甲通」劉舜文強勢加盟《東方波經》，新一季將暢談德甲形勢、戰況同畀投X貼士，佢同蘇斯黑柴雙劍合璧，肯定係全城最強！舜文認為，新季德甲拜仁依然係大超班，但過渡到「哥迪奧拿時代」，會出現勁多變數，而「蜜蜂兵團」多蒙特，仍係拜仁爭取衞冕嘅最大威脅。

哥迪奧拿壓力大
舜文話德甲好睇之處，係周時為球迷帶來驚喜：「98年凱沙羅頓以升班球隊身份奪標，07年史特加、09年禾夫斯堡爆冷稱霸，德甲真係周時估佢唔到。拜仁上季成歐洲三冠王，今季聯賽依然係大超班，但軒歷基斯離開，哥迪奧拿揸旗，佢頂唔頂得住巨大壓力，將係拜仁今季成敗關鍵。」

「哥帥喺巴塞已經證明自己實力，但到另一國家執教，要適應新環境唔係易事。拜仁上季超成功，乜錦標都攞晒，哥帥叻極今季都係打成平手，壓力勁大。係人都知拜仁高層、球迷難服侍，有乜依郁都插到佢暈，加上馬里奧葛斯同堤亞高艾簡達拿來投，中場線爆晒棚，佢點排陣及點同一班球星協調，好考功夫。拜仁換帥令球隊爭標增添好多變數，新一季食粥食飯，就睇哥帥帶隊功力；拜仁衞冕最大敵人，就係自己！」

舜文認為，多蒙特、史浩克04及利華古遜於新季可緊隨拜仁其後，而史特加及禾夫斯堡亦可擾亂大局，反而法蘭克福及弗賴堡，就難以繼續神奇。