美國開「薩」戒吼讓主

猪拉多纳

現今社會工作好、讀書好，甚至乎打機都好，全部離唔開「升呢」兩個字，連踢緊金盃嘅美國都唔例外，領隊奇連士文善用小組出線後4個替補名額，趁機Upgrade「花旗兵團」，今晚8強迎戰掹車邊出線嘅薩爾瓦多，大勝易過借火，1.7倍「讓主」放心捧場。

（有線61、64、201及203周一凌晨4:00直播）

金盃唯一分組賽3戰全勝嘅美國，箭頭雲度路斯基以5球領先射手榜，進攻核心當路雲亦交出2入球及3助攻嘅亮麗成績，之不過「奇哥」好似仲未滿意，踢走演出麻麻嘅靴古利斯高美斯，召入大家耳熟能詳嘅艾迪莊遜，誓以重火力猛攻對手。同時安恩胡與高利艾殊兩名後衞亦提早返歸，換上防線雙塔馬特比斯拿及奧馬干沙利斯，其中後者喺4強先報到，足證「奇哥」今晚幾有信心啅硬對手。
薩爾瓦多鋒力疲弱

薩爾瓦多憑最後一輪分組賽砌低海地，先得以最佳第3名掹掹緊過關，但海地領隊喺呢場分賽後狠插球員：「佢哋根本冇帶對腳落場，靈魂亦唔存在。」足見靠一個極具爭議性12碼奠勝嘅薩爾瓦多，能夠躋身8強全無說服力。再者佢哋喺分組賽入得3球，火力略嫌唔夠之餘，仲全部由前鋒施拿耶包辦，得分點集中成咁，美國肯定派專人「招呼」，今場想話搵食怕且好艱難，專心聽做炮灰啦！