皇馬炒愛奴壯聲威

猪拉多纳

C朗入200粒未夠喉

季尾波鬥志行先，呢個係揀波金科玉律，今晚西甲愛斯賓奴主場迎戰皇家馬德里，前者基本上已經上岸，近期大踢風流波絕對信唔過。相反皇馬下周要出戰西班牙盃決賽對馬德里體育會，借聯賽寓賽於操，射手C朗剛取得自己喺皇馬第200個士哥High到爆，勢必用贏波以壯行色。

（now 632周日凌晨4時直播）

愛斯賓奴季初曾跌到落包尾，好彩高層當機立斷炒咗教練普捷天奴，換上經驗豐富嘅老帥艾古爾，立即穩住軍心。喺呢位墨西哥老帥帶領下，愛奴於季中一度於11仗狂搶22分，成功逃離護級漩渦。

踢波有時講道氣，特別係呢類中型班，順起上嚟作客都能逼和皇馬，但護級目標幾近完成，球員難免有所鬆懈，道氣亦隨之洩晒，近兩仗分別淨負畀CF格蘭納達同西維爾。
備戰西盃寓賽於操

皇馬雖然於聯賽冇晒目標，但眾將並未有Hea踢，除咗因為下周仲有西班牙盃要爭之外，仲由於教練莫連奴離隊幾成定局，下季何人掌帥、組軍方針全屬未知之數，球員唯一可以做嘅，就係盡力踢好餘下賽事，畀新帥留個好印象。

周中皇馬贏馬拉加6比2之役，連雪到硬晒嘅中堅艾比奧爾都識入波，葡萄牙球星C朗更取得於皇馬生涯第200個士哥，今仗為提升入球數字必盡騷哥利，並為下周西盃決賽前壯聲威，作客贏無心戀戰嘅愛奴兩粒冇難度。