曼市雙雄 分途搶W

猪拉多纳

紅魔留力足總盃 放生黑貓歎「細」界

今周英超早場，由新特蘭喺主場同剋星曼聯交手。紅魔近19次對新特蘭取得15勝4和壓倒性優勢，不過佢哋下周一要作客車路士爭入足總盃4強，今場未必會出強陣，撞啱新特蘭首席射手史提芬費查重傷收咧鋒力大減，既然曼聯個W冇肉食、橫睇掂睇又唔似會大炒，咁倒不如捧1.88倍「入球細」仲好。

（有線200及300、廣東體育周六晚8:45直播）

新特蘭暫時「咧」住踢少場排第18位嘅韋根4分，護級形勢都唔係話好樂觀，最大鑊係佢哋之後作客車路士，嚟緊真係搶得1分得1分。雪上加霜嘅，係佔球隊三分一入波嘅前鋒史提芬費查「為國捐軀」，連同隊長卡達莫齊齊宣布提早收咧。今仗「黑貓」要靠喺1月先加盟、仲未開齋嘅丹尼格拉咸攻堅，想入波真係好有難度，睇怕領隊奧尼爾，都會選擇死守博1分算數。
收起尹佩斯 朗尼

客軍曼聯主帥費格遜，日前話到明今季目標係爭做雙冠王，既然聯賽已經拋甩曼城15分，咁即係話，嚟緊佢哋會將注意力集中晒喺足總盃，撞啱過兩日就有場8強重賽硬撼車路士，今晚仲點會去盡呀？賽前更有消息話費Sir今場波會收起連踢2場國際賽嘅朗尼同尹佩斯，用「小豌豆」同韋碧克攻堅，鋒力肯定大減。

再講，雖然曼聯名義上係「黑貓殺手」，但佢哋近3次作客光明球場全部開細，今場面對護級心切嘅新特蘭，想爭取入球都唔易o架。