韋根鬥富咸搶分「大」過天

猪拉多纳

英超球隊富咸今季有貝碧托夫加盟，攻擊力確實有所提升。相比起佢効力熱刺及曼聯時，貝碧托夫嘅活力當然有下滑，但度士覺得「貝碧」係個有波底嘅前鋒，喺富咸夠踢有餘。而周末晚富咸將主場面對韋根，相信兩支同級球隊會把握良機爭勝，肯定唔會打守勢波，大盤可留意。

（有線303及203台周六晚11時直播）

富咸剛啱喺足總盃表現失準，只能與黑池摸和1比1，但度士相信聯賽先至係富咸嘅主要賽場，今次應該有較佳演出。特別要留意保加利亞射手貝碧托夫，佢唔留曼聯轉投富咸，主要原因係佢想長任正選證明自己實力。而今場對手只不過係下游球隊韋根，「瀟灑哥」要入波應該唔難。而韋根近況唔係好，但曾以3比0擊敗主場嘅維拉，實力差極有個譜。反正和波1分對於韋根冇乜幫助，今場隨時會喺客場發圍，希望殺敗富咸。預料兩隊都採用進取式打法，今場入球唔會少，大盤可捧。