史篤城「細」擋頹車

猪拉多纳

英超主場防守王

車路士對上四戰贏輸單跳，時得時唔得，教頭賓尼迪斯背負沉重壓力，靠晒「新魔獸」丹巴巴亞救亡，但今次作客英超主場防守王史篤城好難啃，客勝唔抵玩。史篤城跨季聯賽主場17戰不敗，賽績硬淨，佢哋近季對住車仔有破壞、冇建設，預期今戰入波唔多，要細盤！

（有線300及200台周六晚11時直播）
雷斯削髮有新Look

車路士之前於聯賽主場不敵弱旅昆士柏流浪，上場又喺聯賽盃輸畀史雲斯，表現飄忽，巴西球星大衞雷斯輸波後嬲到削髮，佢媽媽喺twitter上載咗一堆頭髮相，佢將以新形象示人。「王子」費蘭度托利斯長期唔生性，賓尼迪斯惟有寄望丹巴巴亞做到嘢，呢個中鋒頭頂腳踢瓣瓣有，但史篤城後衞勁硬淨，車仔面對密集防守始終欠破關板斧，呢點仍然有待改善。

史篤城今季主場發揮依舊穩定，已經保持英超跨季主場17戰不敗，上次輸波要追溯到去年二月不敵新特蘭，惡氣十足。史篤城勁在守得超穩，本季聯賽主場10戰只失7球，主場失球數字屬英超最少，隊中四個後衞硬淨到暈，中場悍將尼桑斯同格連韋倫破壞力驚人，根本令對手完全冇辦法組織攻勢，門神比高域仲愈打愈有信心，對住車仔完全未驚過。
五鬥車仔全細

車路士尼日利亞中場約翰米基爾及箭頭域陀摩西斯已離隊備戰非國盃，後者近期成為球隊進攻重要棋子，缺陣令側擊力受削，大軍續有門將施治養傷，隊長泰利傷愈可候命，人腳尚算完整。史篤城基本上可夫添出擊，大軍近五戰車路士未贏過兼全細，五場波加埋入得一粒，守得穩，但欠士哥本錢，今戰繼續穩守突擊，睇怕士哥唔多。