法國有仇報仇爆破白俄

魑魅魍魉

03/06/2011
文： 朱楓

正所謂風水輪流轉，白俄羅斯喺9個月前做低法國好不威風，今晚兩隊喺歐國盃外圍賽D組合演榜首大戰。但今時唔同往日，當日嘅「公雞兵團」法國已經重生，今輪仲有「幸運童子」艾比度回歸，對住受傷停困擾陣容殘到爆嘅白俄，肯定有仇報仇，1.52倍客W值捧！（now714台及中央5台周六凌晨2:50直播）




仲記得法國喺上年世盃因內訌而恥辱性出局，之後喺首場歐國盃外圍賽主場竟以0:1不敵白俄羅斯，正當大家以為「公雞兵團」會繼續衰落去之際，佢哋喺白蘭斯領導下，知恥近乎勇，唔止喺歐國外節節勝利，喺熱身賽更先後擊敗英格蘭同巴西兩大勁旅。


白俄8主力打柴缺陣


其實法國之所以重生，全靠領隊白蘭斯大刀闊斧，重用拿斯尼等一班被前任領隊杜明歷低估嘅球員。雖然麥薩斯、哥斯尼同基捷基治今次都落選，但卻有後防艾比度重新歸隊。呢位巴塞後防近排行運行到腳趾尾，進行肝臟手術後唔止極速復出，仲喺歐聯決賽打足全場兼以隊長身份捧盃，法國今晚有呢位「幸運童子」鎮守後防肯定有運行，加埋有首次入選嘅應屆法甲助攻王馬雲馬田隨時候命，簡直係毫無瑕疵。




白俄羅斯可謂係今屆歐國外最有驚喜球隊，暫時喺D組排第2，如果嚟緊擊敗法國同盧森堡，仲可以過埋法國頭做榜首，但講就容易，白俄今晚對住法國唔輸都難，事關白俄今次有前鋒哥利蘭高、中場古爾治、後防莫路殊停賽，發電機希比、前鋒古杜索夫、洛迪安洛夫、中場基維斯同門將艾美利真高更全部因傷落選，一時間冇咗8位主力，今晚對法國再想創奇迹？不如早啲瞓好過啦！


白俄旺開「細」


‧近8場獲3勝3和2負，當中7場開細。




‧世界排名53，比法國低34位。

法國近7戰6勝

‧自歐國外首仗不敵白俄後，之後7戰獲6勝1和。

‧前鋒賓施馬近5場國際賽勁入3球。