朝早有動靜：大摩父子跟實步步穩

博彩老头

　　昨日為周日賽事排位之期， 六時左右掛三號風球，然氣氛不減，可觀動態委實不少，當中以鄭俊偉、大摩兩個馬房備戰最為認真，前者搵勞愛德、韋達兩位大師傅代為操馬。馬房大舉練兵，大摩騰出騰入督操之鏡頭此起彼落，不妨多加留意。

　　七時左右， 大摩旗下戰馬，「閒話一句」、「同一世界」、「步步穩」等駒陸續往草地試跑，分由勞愛德、白德民負責考驗，前往起步點時，大摩父子踏單車伴隨人馬到閘前，親自打點一番，課後接馬自是少不了，動態一如近期出擊之前，值得重視。

　　鄭俊偉馬房「極速寶寶」、「好友福」兩駒本配巫斯義，但已換上後備騎師，米高鄭早有兩手準備，昨朝已由後備騎師勞愛德、韋達替上述兩匹馬出試，期間練者兩頭騰，穿梭於烽火台及沙圈之間，馬兒跳罷，即見其匆匆往馬房出入口空地接馬，跟住又捉實騎師猛傾，態度十分肉緊，真係要多加留神。