高清睇跑馬：愛跑得 速高連捷

猪拉多纳

　　上季「嘉寶神駒」轉由大告接手一段日子後，直至六月中先跑一次並全無表現；不過，今季開鑼日已派上陣，縱使賽前快跳次數不多，但一樣夠膽搏殺。

　　該戰排十三檔，出閘後勞愛德諗住走內檔搵遮擋，但內叠塞滿多駒故被迫走外檔，騎者眼見位置尷尬，去到九百米即選擇發力搶前，但當時開始入彎兼在外叠，用力之多可以想像，如此劣勢仍跑第二，再看季軍打後馬全部遠遠落後，更見「嘉寶神駒」的表現出色，今日易配卓利排九檔，有力後上爭雄。

　　「愛跑得」戴罩後成績優異，尤其今季開鑼戰跟「嘉寶神駒」一樣，賽前準備未算充足，體重更較上季最後一役重二十磅，但依然捧至三倍開跑，結果排二檔起步後，鄭雨滇捉實仍放出，就連出名夠快的「奪寶」亦不及前駒，第二段更締出21.7的極速時間；雖然放得咁快，但「愛跑得」入到直路未有力弱，並繼續爆出強勁衝刺，而一路跟實的「奪寶」更被愈拋愈遠，最後「愛跑得」不用多加催策下輕勝，並跑出1分21秒5的快時間；單憑該役表現，便知今仗升上一班同樣夠爭，有力連捷兼捧盃。

Sam